Լուրեր Հայաստանից և աշխարհից՝ «մեկ տողով». 17.02.2021
ՎիդեոՀանրապետության գրեթե ամբողջ տարածքում ձյուն է տեղացել, Երեւանում՝ անձրեւ։ Շրջանների մեծ մասում մինչեւ կեսօր ուժեղ քամիներ են փչել։ Որոշ հատված քամիներն առաջացրել են ավերածություններ՝ պոկելով տանիքներ ու վնասելով ավտոմեքենաներ։ Դիլիջանի ոլորանները դժվարանցանելի են։ Ծովագյուղից դեպի Դիլիջանի թունել սաստիկ բուք է։ Օդի ջերմաստիճանը մինչեւ շաբաթվա վերջ, ըստ օդերեւութաբանների, աստիճանաբար կնվազի 13-16 աստիճանով:
Անցած պատերազմի, բանակի սպառազինության, քաղաքական ապագայի շուրջ «Արմյնուզ» հեռուստաընկերության հետ հարցազրույցում շարունակել է դիտարկումները ներկայացնել ու բացահայտումներ անել երրորդ նախագահ Սերժ Սարգսյանը։ Ալիեւը սխալվում է, կարծելով, թե հաղթել է Հայկական բանակին կամ հայ ժողովրդին, իրեն կամ Ռոբերտ Քոչարյանին ու իր ստեղծած բանակին։ Բանակը չի պարտվել, պարտվել է կապիտուլյանտը, ասել է նա:
Նա հերքել է, իր խոսքով, այն տխմար թեզը, թե իբր մինչև 2018 թվականը մեր բանակը մարտունակ չէր, սպառազինություն չուներ և այլն։ Եթե այդ վիճակն էր բանակում, ապա ինչու Ալիևը պատերազմ չէր սկսում նախորդ տարիներին, հարցրել է երրորդ նախագահը։ Սերժ Սարգսյանը պատմել է, որ բանակի՝ 2018-2024 թվականների համար նախատեսված էր 1 մլրդ 300 մլն դոլար, 500 մլն-ից ավելին նախատեսված էր ավիացիայի, ՀՕՊ-ի և անօդաչու թռչող սարքերի կատարելագործման ու ձեռքբերման համար: Մինչև 2024 թիվը ձեռք էր բերվելու 2500 անօդաչու թռչող սարք: Բայց գործող իշխանություններն այդ գործարքները չարեցին, 3 ՏՈՌ համակարգերից մեկը գնեցին, ձեռք բերեցին ՍՈՒ-30, որը կիրառելի չէր։ Պատերազմի կառավարմանը, Սերժ Սարգսյանի խոսքով, անհարկի միջամտություններ են եղել, ոչ կոմպետենտ մարդկանց կողմից: Ամեն անգամ պարտադրվում էր բեկում մտցնել ռազմական գործողություններում, ինչն առանց նախապատրաստության՝ անթույլատրելի է։ Ինքը Բակո Սահակյանի միջոցով փորձել է խորհուրդներ փոխանցել ու իր ծառայություններն առաջարկել Արցախի նախագահին, որն այդպես էլ իրեն չի ընդունել։ Սերժ Սարգսյանը պատասխանել է նաեւ նախկինների հրահրմամբ դավադիր պատերազմ սկսելու եւ մեղքն իր վրա գցելու Փաշինյանի հայտարարությանը։
Ապրիլյան պատերազմի հետաքննությունը եւ գեներալներին ու հերոսներին հետապնդելու քայլերը Սարգսյանի բնորոշմամբ՝ բանակը ջախջախելու հերթական փուլն էր: 3-րդ նախագահը ցավով է նշել, որ իշխանությունը հրաժարվել է նախկին հրամանատարների պատրաստակամորեն առաջարկած ծառայություններից, մինչդեռ, երբ Շուշիի ճակատագիրն արդեն որոշված էր, իշխանական լրատվամիջոցներով գովերգում էին Սեյրան Օհանյանին։
Շուշին ոչ թե ընկել է, այլ հանձնվել, համոզված է Սերժ Սարգսյանը։ Ըստ նրա, նաեւ այնպես չէ, որ Թուրքիան միայն այս պատերազմում է աջակցել Ադրբեջանին, այդպես էր նաեւ նախորդ պատերազմներում։ Սակայն այս համատեքստում չէր կարելի վատացնել Ռուսաստանի հետ հարաբերությունը, խաղալ ՀԱՊԿ-ի հեղինակության հետ՝ Խաչատուրովին հետ կանչելով։ 3-րդ նախագահը զարմացած է նաեւ, որ Իսկանդերի պես հզոր զենքը չի կիրառվել հենց պատերազմի 3-4-րդ օրը, երբ հայտնի էին ադրբեջանական զորքերի կուտակումների վայրերը։ Բանակում կոռուպցիայից խոսողներն, ըստ Սերժ Սարգսյանի, պետք է բացատրեն, թե ինչու են շատ բարձր գնով՝ 600 դոլարով, մեծ քանակությամբ զրահաբաճկոն ձեռք բերել։
Վերականգնվելու համար բոլորիս սպասում է դժվարին աշխատանք, բոլորս այդ ուղղությամբ պետք է աշխատենք, ասել է Սերժ Սարգսյանը եւ շեշտել, որ ինքը ոչ մի պարագայում պետական ղեկավար պաշտոն այլեւս չի զբաղեցնի։
Արցախում ռուսական խաղաղապահ զորակազմի հրամանատարության միջնորդությամբ, երեկ ադրբեջանցիները Արցախյան կողմին են հանձնել 106 զոհվածի մարմին: Արցախի նախագահ Արայիկ Հարությունյանը Ֆեյսբուքով հայտնել է, որ կողմերը սկսել են նաեւ ջանքեր գործադրել 1990-ականների պատերազմի հայ եւ ադրբեջանցի զոհերի աճյունների որոնման ու միմյանց փոխանցելու ուղղությամբ:
Նիկոլ Փաշինյանը հեռախոսազրույց է ունեցել Ռուսաստանի Դաշնության նախագահ Վլադիմիր Պուտինի հետ: Կողմերը քննարկել են 2020 թվականի նոյեմբերի 9-ի համատեղ հայտարարության կետերի իրականացման ընթացքը: Մասնավորապես, ընդգծվել է ռազմագերիների, պատանդների եւ պահվող այլ անձանց շուտափույթ վերադարձի կարեւորությունը: Հայկական կողմը մտահոգություն է հայտնել, որ Ադրբեջանը լիարժեք չի կատարում համատեղ հայտարարության տվյալ կետի պահանջները:
Նիկոլ Փաշինյանը խորհրդակցություն է անցկացրել Շիրակի մարզպետարանում, քննարկել Շիրակի մարզի ընթացիկ եւ ռազմավարական խնդիրները։
Փաշինյանը նաեւ հանդիպում է ունեցել շիրակցի գերեվարվածների հարազատների հետ։
Արցախի Ազգային ժողովի Գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի անդամները շրջանառության մեջ են դրել «Լեզվի մասին» օրենքում փոփոխություններ կատարելու նախագծերի փաթեթ, որով առաջարկում են ռուսերենը եւս դարձնել Լեռնային Ղարաբաղի Հանրապետության պաշտոնական լեզու։ Օրենսդրական նախաձեռնությունը դեռ պետք է հավանություն ստանա Ազգային ժողովի կողմից։
Ռազմական դրությամբ պայմանավորված՝ մինչև 2022 թվականի մարտի 1-ը ԱՀ համայնքներում ՏԻՄ ընտրություններ չեն անցկացվի: Այս մասին հրամանագիր է ստորագրել Արցախի նախագահ Արայիկ Հարությունյանը։ Որոշ ընդդիմադիր փորձագետներ կարծք են հայտնել, որ Արցախում ընտրություններ չանցկացնելու պահանջը եղել է Ադրբեջանից։
Հայաստանում գրանցվել է կորոնավիրուսով վարակվելու 206 նոր դեպք։ Մահացել է 6 վարակակիր, որոնցից մեկի մահը վրա է հասել այլ հիվանդության պատճառով: Մահացածների ընդհանուր թիվը 3948 է։
Բիթքոինը հերթական ռեկորդն է գրանցել․ սակարկությունների ժամանակ վիրտուալ արժույթի գինն աճել է 4,15 տոկոսով եւ բարձրակետին հասել 51,2 հազար դոլարի:
ԱՄՆ դոլարի փոխարժեքը նախորդ օրվա համեմատ նվազել է 0.59 դրամով ու կազմել 524.33 դրամ: Եվրոյի փոխարժեքը նվազել է 5.49 դրամով ու կազմել 632.60 դրամ, բրիտանական ֆունտի փոխարժեքը նվազել է 3.45 դրամով ու կազմել 727.82 դրամ, իսկ ռուսական ռուբլու փոխարժեքը նվազել է 0.05 դրամով ու կազմել 7.11 դրամ:
Հայաստանի մարզերի մեծ մասում փետրվարի 18-ին սպասվում են տեղումներ, լեռներում ու նախալեռներում` ձյան տեսքով: Երեւանում սպասվում է թաց ձյուն: Առաջիկա գիշերը մայրաքաղաքում կլինի 0 +2, վաղը ցերեկը` +4 +6:
