Որոնողական աշխատանքները երկու շաբաթ հետո դադարեցվո՞ւմ են․ ի՞նչ է կատարվում Մարմարիկում

Փոքրիկ Տիգրանին 2 շաբաթից ավելի է չեն կարողանում գտնել. 15 օր է անցել, ինչ կորել է 2–ամյա փոքրիկը, և ամբողջ Հայաստանը շունչը պահած սպասում է դրական նորությունների։ 

MediaHub–ին ՆԳՆ–ից հայտնեցին, որ անհետ կորած համարվող 2-ամյա երեխայի որոնողական աշխատանքները շարունակվում են։

«Ինտենսիվությամբ վերսկսվել են որոնողական աշխատանքները, ՆԳՆ Փրկարար ծառայության և Ոստիկանության ծառայողները որոնողական աշխատանքներն շարունակում են իրականացնել ինչպես Մարմարիկ բնակավայրում և հարակից տարածքներում, այնպես էլ Մարմարիկ գետի երկայնքով և Աղբյուրակի ջրամբարում»,– նշեց ՆԳ մամուլի քարտուղար Նարեկ Սարգսյանը։ 

Ըստ Սարգսյանի՝ որոնողական աշխատանքներում օգտագործվում են դրոններ, ջրասուզակներն օրվա ընթացքում մի քանի անգամ սուզվում են, փրկարար ծառայողները գետի երկայնքով և հարակից տարածքներում որոնողական աշխատանքներ են իրականացնում, Փրկարար ծառայությունը նաև ջրամբարում հատուկ տեխիկայի միջոցով է նկարում ջրամբարի հատակը և այլն։

Որոնողական աշխատանքները, հիմնականում, դադարեցվում են 10 օր հետո։ Արդյո՞ք ՆԳՆ-ն կդադարեցնի փոքրիկ Տիգրանի որոնումները։ «Ո՛չ, որոնողական աշխատանքները շարունակվում են, չնայած, որ 10 օրից, երկու շաբաթից ավելի ժամանակ է անցել»,– ասացին ՆԳՆ–ից։

MediaHub–ն առաջին օրվանից ուշադրության կենտրոնում է պահել այս առեղծվածային դեպքը, օրեր շարունակ ուղիղ եթերով լուսաբանել Մարմարիկ գյուղից փրկարարական ու որոնողական աշխատանքները, բայց ոչ մի նորություն դեռ չկա։

Նշենք, որ MediaHub–ին ՆԳՆ–ից հայտնել էին, որ ստուգվել են գնչուների և այլ վարկածներ, անգամ մանեկեն են գցել գետը, այլ միջոցներ են կիրառվել, սակայն, երեխային դեռ չեն գտել։

Մարիաննա Արամյան