Արթուր Ավագիմյան. Այս պահին չեմ մտածում հավաքական հրավիրվելու մասին
Սպորտ
Ֆուտբոլի Ուկրաինայի առաջին լիգայի առաջատար Օդեսայի «Չեռնոմորեցի» 23-ամյա կիսապաշտպան Արթուր Ավագիմյանը պատմել է, թե արդյոք ստացել է Հայաստանի հավաքականում խաղալու հրավեր:
«Ինձ հետ դեռ կապ չեն հաստատել: Եթե անկեղծ, շատ բարդ է հայտնվել Հայաստանի հավաքականում՝ խաղալով Առաջին դիվիզիոնում: Բացի այդ, ես ունեմ ուկրաինական անձնագիր, այդ պատճառով այդ կողմից նոր շարժումներ չկան: Անկեղծ ասած, այս պահին չեմ մտածում հավաքականի մասին: Ցանկանում եմ խաղալ: Եթե ես կանոնավոր կերպով խաղամ, առաջադիմեմ ու բարելավեմ իմ խաղը, ապա և՛ հավաքականը, և՛ մնացած ամեն բան կստացվի ինձ մոտ: Պետք է աշխատել, այլ ոչ թե ճախրել երկնքում: Ես նախընտրում եմ մարզվել, աշխատել ինձ վրա ու խաղալ: Հավաքականը ոչ մի տեղ չի կորչի, եթե ես ցուցադրեմ լավ մակարդակի ֆուտբոլ:
Արդյո՞ք կան մտքեր խաղալ Ուկրաինայի համար. երբեք մի ասա երբեք: Ամեն բան հնարավոր է, սակայն կրկնեմ, որ ես հիմա չեմ մտածում այդ մասին: Բարդ է խոսել որևէ հավաքական հրավիրվելու մասին, երբ դու հանդես ես գալիս Առաջին դիվիզիոնում: Այդպիսի հայտարարություններ անելն ու հավաքական հրավիրվելուն սպասելու մասին խոսելը ճիշտ չի լինի իմ կողմից, նույնիսկ՝ կլինի հիմարություն: Առջևում կա շատ աշխատանք: Առաջնայինն առաջադիմել ու օգնել «Չեռնոմորեցին» դուրս գալ ուժեղագույնների լիգա: Դրա մասին են իմ մտքերը»,- Ավագիմյանի խոսքը մեջբերում է Footboom.com-ը:
Հիշեցնենք, որ Արթուր Ավագիմյանը ձմեռային տրանսֆերային պատուհանի ընթացքում Երևանի «Ալաշկերտից» է տեղափոխվել «Չեռնոմորեց»: Ուկրաինայի առաջին լիգայի ընթացիկ առաջնության 14 տուրերում նա դարձել է 4 գոլի հեղինակ:
