Reuters. Էրդողանը ՆԱՏՕ-ի գլխավոր քարտուղարի հետ կքննարկի Ուկրաինայի շուրջ վերջին իրադարձությունները

Թուրքիայի նախագահ Ռեջեփ Թայիփ Էրդողանը ռուս-ուկրաինական պատերազմի վերջին զարգացումները երկուշաբթի օրը կքննարկի ՆԱՏՕ-ի գլխավոր քարտուղար Մարկ Ռյուտեի հետ՝ վերջինիս Անկարա կատարելիք այցի ընթացքում, հայտնում է Reuters-ը՝ վկայակոչելով թուրք պաշտոնյային։

Երկուշաբթի օրը կայանալիք բանակցությունների ընթացքում Էրդողանը և Ռյուտեն կքննարկեն նաև ՆԱՏՕ-ի դաշնակիցների միջև պաշտպանական գնումների խոչընդոտների վերացման և ահաբեկչության դեմ ռազմական դաշինքի համատեղ պայքարի հարցերը, հայտնել է թուրք պաշտոնյան:

Հինգշաբթի օրը Ռուսաստանը նոր հիպերձայնային բալիստիկ հրթիռով հարվածել էր Ուկրաինային՝ ի պատասխան Կիևի կողմից Ռուսաստանի դեմ ամերիկյան և բրիտանական հրթիռների օգտագործման, ինչը պատերազմի սրում է նշանավորում:

ՆԱՏՕ-ի անդամ Թուրքիան հայտարարում է, որ պաշտպանում է Ուկրաինայի տարածքային ամբողջականությունը և ռազմական աջակցություն է ցուցաբերում Կիևին։

Սակայն Թուրքիան դեմ է նաև Մոսկվայի դեմ արևմտյան պատժամիջոցներին, որի հետ նա կարևոր պաշտպանական, էներգետիկ և զբոսաշրջային կապեր ունի:

Էրդողանն ավելի վաղ դեմ էր արտահայտվել ԱՄՆ-ի որոշմանը, որով թույլ է տրվում Ուկրաինային հեռահար հրթիռներ օգտագործել Ռուսաստանի տարածքներին հարվածելու համար՝ ասելով, որ դա ավելի կբորբոքի հակամարտությունը: