Էրդողանը կատարում է նույն վայրագությունները, որոնցում մեղադրում է Իսրայելին․ ԶԼՄ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ամերիկյան ձեռնարկատիրության ինստիտուտի (American Enterprise Institute) ավագ վերլուծաբան Մայքլ Ռուբինը The Washington Times-ում հրապարակված հոդվածում մեղադրել է Թուրքիայի նախագահ Ռեջեփ Թայիփ Էրդողանին երկակի ստանդարտների մեջ, որոնք արտացոլում են նրա հակասեմականությունն ու ռասիզմը:

Նա հիշեցրել է Էրդողանի մեղադրանքներն Իսրայելի դեմ, ինչպես նաև այն, որ վերջինս Իսրայելին անվանել է «ահաբեկչական պետություն»։

Ընդ որում, ըստ հոդվածի հեղինակի, Էրդողանի կառավարման սկզբում խորհրդավոր սուբսիդիաներն օգնեցին Հիտլերի «Իմ պայքարը» գրքի թուրքերեն թարգմանությանը դառնալ ազգային բեսթսելլեր, իսկ 2016 թվականին The Guardian-ը հայտնել էր, որ Էրդողանը նացիստական ​​Գերմանիան անվանել է արդյունավետ նախագահական համակարգի օրինակ։

«2012 թվականի Fox News-ի զեկույցի համաձայն՝ Էրդողանի կինը՝ Էմինեն, աջակցել է թուրքական «Գայլերի հովիտ» ֆիլմին, որն առաջ է քաշում այն տեսությունը, թե Իրաքում պատերազմը մասամբ պայմանավորված է եղել հրեաների կողմից օրգանների առևտրով: Էրդողանի գլխավոր խորհրդական Էգեմեն Բաղիսը հայտարարել էր, Բուլղարիայի արտգործնախարարը չի աջակցել Թուրքիայի՝ ԵՄ անդամակցությանը, քանի որ հրեական արյուն ունի»,- ասվում է հոդվածում։

Նշվում է, որ զավեշտն այն է, որ Թուրքիան մեղավոր է նրանում, ինչում մեղադրում է Իսրայելին։ Թուրք զինվորականները դաժանորեն հարձակվում են քրդական գյուղերի ու քաղաքների վրա ոչ միայն Թուրքիայում, այլեւ Սիրիայի ու Իրաքի սահմաններին։ Թուրքական անօդաչու սարքերը ոչ ոքի չեն խնայում։ Թուրքիայի սեփական հաշվարկներով՝ նրանք 2016 թվականից «չեզոքացրել» են մի քանի հազար քրդերի։ Թուրքիան տարբերություն չի դնում քուրդ ահաբեկիչների և խաղաղ բնակիչների միջև։ Սինջարի եզդի ֆերմերները խոսում են Թուրքիայի կողմից պարբերական ռմբակոծությունների մասին։ Բաղդադը «բռնկվեց» այն բանից հետո, երբ թուրքական անօդաչու թռչող սարքը սպանեց երիտասարդ արաբ ընտանիքի՝ մրցակցի կողմից կեղծ տեղեկություն տալուց հետո: ՄԱԿ-ի փախստականների հարցերով գերագույն հանձնակատարը խոստովանել է, որ թուրքական անօդաչու թռչող սարքերը կարող են նույնիսկ թիրախավորել իրենց ավտոշարասյունները, եթե մութն ընկնելուց հետո իրենք ճանապարհին լինեն:

Ռուբինը նշում է, որ Թուրքիան քրդերին անվանում է ահաբեկիչներ միայն այն պատճառով, որ նրանք ապրում են քրդական ինքնակառավարման պայմաններում։ Սիրիական Աֆրինում, որը Թուրքիան գրավել և այնուհետև այնտեղ էթնիկ զտումներ կատարել, թուրքական զորքերը փորել են քրդական գերեզմանատները, ոչնչացրել քրդական արձանները և փակել քրդալեզու դպրոցները:

«Պարոն Էրդողանը ճիշտ է միայն մի բանում. միջազգային մարդասիրական իրավունքի խախտումները, որոնք նա նկարագրում է, պետք է բանտ նստեցնեն հանցագործներին: Միգուցե, եթե նա անկեղծ է, պետք է սկսի ծրագրել իր ուղևորությունը Հաագա»,- եզրափակել է հեղինակը: