Խաղաղության պայմանագիրը կստորագրվի ռուսական հարթակում. Բալասանյան
ՀասարակությունՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Փաշինյան-Ալիև հանդիպումների չեղարկումն ու հարթակների «աճուրդը» պայմանավորված է աշխարհաքաղաքական կենտրոնների քաղաքականությամբ։ Այս մասին MediaHub-ի հետ զրույցում հայտնեց միջազգայնագետ Գրիգոր Բալասանյանը։
«Արևմուտքը 3+3 ձևաչափով հանդիպումից հետո հասկանալով, որ առանց իր միջամտության կարող են հարցեր լուծել, շտապ որոշել է հանդիպում կազմակերպել։ Ալիևը կարծում է, որ ԵՄ-ի հետ իր բոլոր հարցերը կարգավորել է և հիմա հավատարմություն է ցույց տալու ռուսական կամ իրանական հարթակներին, ինչից հրաժարվելը մեզ համար բավականին ծանր հետևանքներ է ունենալու, որովհետև չի կարելի թույլ տալ, որ այդ երկու հարթակներն անցնեն Ադրբեջանի կողմը և որդեգրեն պրոադրբեջանական դիրքորոշում»,- նշեց քաղաքագետը։
Մեր զրուցակցի խոսքով՝ պետք է օգտագործել բոլոր հարթակները, բայց ոչ մեկը մյուսի հաշվին։ Հայկական կողմի խուսափելը ռուսական հարթակներից և Բիշքեք չմեկնելը ճիշտ չէ, հիմա «նեղացած» խաղալու ժամանակը չէ, և դա մեր շահերից չի բխում, ասում է Բալասանյանը։ Այդ քայլով Ալիևին հերթական անգամ հնարավորություն է տրվում անել հայտարարություններ և պահանջներ ներկայացնել՝ չունենալով իր դիմաց հակառակը պատասխանողին։
«Այդ քայլի համար ոչ մեկ մեր գլուխը չի շոյելու, ոչ ոք Եվրոպայից չի զանգելու Ալիևին և պնդի, որ պահանջներ չներկայացնի, իսկ ռուսական կողմը, տեսնելով հայկական կողմի պարբերաբար շարունակական բացակայությունը հանդիպումներից, վերագրելու է որպես անձնական վիրավորանք և գուցե որոշի շատ չընդդիմանալ ադրբեջանական պահանջներին»,- նշեց Բալասանյանը։
Անդրադառնալով խաղաղության պայմանագրի ստորագրման ժամկետներին և ստորագրման հարթակներին՝ մեր զրուցակիցը նշեց․ «Չեմ կարծում, որ մինչև տարվա վերջ ստորագրվի խաղաղության պայմանագիրը, քանի որ դեռ անցյալ տարվա վերջ պետք է այն ստորագրվեր, սակայն մենք տեսնում ենք, որ գործընթացը հետաձգվում է»։
«Պայմանագիրը, երբ էլ ստորագրվի, համոզված եմ, լինելու է ռուսական հարթակում, նվազագույնը՝ իրանական, բայց ոչ՝ եվրոպական»,- հավելեց մեր զրուցակիցը:
Նշենք, որ այսօր հայտնի դարձավ, որ Նիկոլ Փաշինյանը չի մեկնելու ո՛չ Բրյուսել, ո՛չ էլ վաղը Բիշքեկ:
Մարիա Զարգարյան
