Ուրեմն մեր դիպլոմը հեչ, ձեր ատեստավորումը մե՞ջ. մանկավարժները դժգոհ են ԿԳՄՍՆ-ից
ՀասարակությունՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Կամավոր ատեստավորման մասին բողոքները չեն դադարում, ԿԳՄՍՆ-ում էլ կարծես չեն կողմորոշվել՝ ինչպես վարվել ատեստավորումը չհաղթահարած ուսուցիչների հետ։
Սեպտեմբեր ամսին Երևանի, մարզերի տարբեր դպրոցներում աշխատող ուսուցիչները մի քանի բողոքի ակցիաներ իրականացրեցին և հանդիպեցին ԿԳՄՍ նախարար Ժաննա Անդրեասյանի հետ, սակայն դժգոհ մնացին և պահանջեցին իրենց հարցերին այլ լուծումներ։
Համացանցում արագորեն տարածվեց այն լուրը, որ Արտենիի միջնակարգ դպրոցի տնօրենը չի թողել, որ ռուսաց լեզվի ուսուցիչը մտնի դասարան, քանի որ երկրորդ անգամ չի անցել կամավոր ատեստավորումը։ MediaHub-ը կապ հաստատեց մի քանի ուսուցիչների հետ՝ հասկանալու նրանց դիրքորոշումն ու կարծիքը ատեստացիայի վերաբերյալ։
«Ընդունեք օրենք, որով դուրս չթողնեն ուսուցչին, քանի որ նախարարության կազմած թեստերով չէ, որ որոշվում է ուսուցչի գիտելիքը: Ատեստացիան կամավոր է, իսկ ի՞նչ է նշանակում կամավոր ըստ իրենց։ Օրինակ՝ անգլերենի թեստը կապ չուներ անգլերենի հանրակրթականի մակարդակի իմացության հետ, պատմության մասին պարզապես լռում եմ, քանի որ խայտառակություն է, իսկ ռուսաց լեզվի թեստում այնպիսի հարցեր են ներառված, որ ընհանրապես կապ չունեն դասավանդվող նյութի հետ։ Ուզում եք` օրենսդրությունից հարցեր կազմենք, ոչ մեկդ էլ չեք հաղթահարի նախարարությունում։ Ուրեմն մեր դիպլոմը հեչ, ձեր ատեստավորումը մե՞ջ»,- վրդովվեց երկար տարիների աշխատանքային ստաժ ունեցող ուսուցչուհիներից մեկը:
Մեր զրուցակիցներից մեկն էլ նշեց՝ սովորում են, ավարտում, ստանում են մանկավարժի որակավորում, որ ինչ-որ անիմաստ թեստ որոշի ուսուցիչը կարող է դասավանդել, թե՞ ոչ։
Միշտ ասում են, որ դասախոսներն ավելի դժվար են նյութը մատուցում, սակայն բոլորը վստահ են, որ իրենք ունեն գիտական աստիճան և տեղյակ են մի շարք պրակտիկ օգտագործվող նյուանսներից, բայց իրենք մանկավարժ չեն, մանկավարժն է, որ նյութը մատուցում է դպրոցում և երեխայի մեջ սերմանում մի շարք արժեքներ։
«Ուսուցչի դերը շատ է նվազել այս երկրում, մեզ հետ հաշվի չեն նստում, նախարարը ձևական տեքստեր է ասում և այս կառավարությունից արդեն հույս չունենք, ուսուցիչը չգիտի՝ ում դիմի»,- շեշտեց մեր զրուցակիցը։
Նա նշեց, որ աշխատավարձերը բոլորինը կարելի էր բարձրացնել, իսկ երիտասարդ ուսուցիչներին իմպուլս տալու համար նրանց առաջարկել ատեստավորում և աշխատավարձի բարձրացում։ Օրինակ, կարելի է շտեմարան ստեղծել 5000 հարցից բաղկացած և թող պարապեն այն ուսուցիչներն, ովքեր ցանկանում են մասնակցել կամավոր ատեստավորման։
«Խեղկատակություն է այդ ամենը, 25 տարվա մանկավարժին իրենց օրենքի պատճառով կարող են աշխատանքից ազատել և պատճառաբանել, թե գիտելիքը չհերիքեց»,- հավելեց մանկավարժը:
