Սևանում կազմակերպած փարթիին մասնակցել է նաև ՔՊ աշխատակազմի ղեկավար Տրդատ Սարգսյանը
ՀասարակությունIrakanum.am-ն արդեն տեղեկացրել էր, որ իշխանական «Իմ քայլը» խմբակցության պատգամավոր Հայկ Սարգսյանի մասնակցությամբ Սեւանի լողափերից մեկում երեկ տեղի է ունեցել բազմամարդ խնջույք, որը կազմակերպվել և իրականացվել է պարետատան կանոնների կոպիտ խախտումներով։ Ինքը՝ Հայկ Սարգսյանը դեռեւս չի մեկնաբանել կատարվածը։ Մինչդեռ մամուլում տեղեկություններ կան, որ լողափը պատկանում է պատգամավորին։ Տարածված լուսանկարներից մի քանիսում պարզ երեւում է, թե ինչպես է Սարգսյան Հայկը համակարգչով ինչ-որ բաներ ստուգում, ամենայն հավանականությամբ՝ օրվա «դախոդը»։ Իշխանական պատգամավորի մասնակցությամբ փարթիին անդրադարձել է Իմ քայլը խմբակցության ղեկավար Լիլիթ Մակունցը, տալով ծիծաղելի պարզաբանում։ Ըստ Մակունցի՝ Սարգսյան Հայկը մի պահ է հայտնվել խրախճանքի վայրում և վերջ։ Իհարկե իշխանության ներկայացուցիչը չի մոռացել հայտնել, որ դիմակ չկրելու համար Սարգսյանը կտուգանվի։
«Խոսակցությունը շատ արագ է տևել, քանի որ ես շտապում էի ասուլիսի։ Նա ինձ տեղեկացրեց, որ որևէ միջոցառում չի կազմակերպել, մի քանի օրով գտնվում է հանգստյան գոտում, որտեղ հանգստանում են նաև այլ քաղաքացիներ։ Նա նաև տեղեկացրեց, որ անզգուշություն է թույլ տվել՝ գտնվելով այդ վայրում, որը եղել է մարդաշատ՝ եղել է առանց դիմակի։ Հայկ Սարգսյանը հայցում էր «Իմ քայլը» խմբակցության ներողամտությունը, որ անզգուշություն է թույլ տվել և այդ պահին դիմակ չի կրել։ Որքանով տեղյակ եմ, նա իր գործողությունների համար պետք է արդեն տուգանված լինի՝ անկախ նրանից, որ դա եղել է անզգուշություն»,- նշել է Լիլիթ Մակունցը։ Իհարկե Մակունցը կարող էր նաեւ նշել, որ Սարգսյանը պարզապես մոլորվել էր Սևանում եւ լրիվ պատահականության զոհ է դարձել, հայտնվելով խնջույքի վայրում։
Սարգսյան Հայկից բացի իշխանական այլ ներկայացուցիչներ եւս մի պահ մտել են դեպքի վայր։ Մասնավորապես Սեւանի հով լողափին զովացել է նաեւ Վայոց Ձորի նախկին մարզպետ Տրդատ Սարգսյանը, ով մարզպետությունը թողնելուց հետո նշանակվել էր ՔՊ աշխատակազմի ղեկավար։
Սարգսյանը հրաժարական էր ներկայացրել Վայոց Ձորում փոխգնդապետ Արա Մխիթարյանին դաժան ծեծի ենթարկելու միջադեպից հետո: Փոխգնդապետի հարազատները պնդում են, որ նա ներկա է եղել միջադեպին եւ չի դադարեցրել ծեծկռտուքը: Զինվորականը դեռ պայքարում է կյանքի համար, իսկ Տրդատ Սարգսյանը իշխանական կայֆերի մեջ է։
