Դահլիճում նստած պատվիրակը գուցե այն զինվորն է, որ սպանել է իմ որդուն. զոհվածի մայր
ՀասարակությունԵրեւանում շարունակում է ընթանալ Եվրանեսթ խորհրդարանական վեհաժողովի հանձնաժողովների նիստերը։ Եվրանեսթ խորհրդարանական վեհաժողովի իրավական, մարդու իրավունքների եւ ժողովրդավարության հարցերի հանձնաժողովի նիստը գլխավորում է ԱԺ ՔՊ խմբակցության պատգամավոր Մարիա Կարապետյանը։
Նիստերին մասնակցում են ադրբեջանցի երկու պատգամավոր, ինչն էլ բողոքի ակցիայի առիթ է հանդիսացել, «Համալիրի» դիմաց ընդդեմ Հայաստան ժամանած Ադրբեջանի պատվիրակության հերթական բողոքի ակցիան է մեկնարկել։
«Երբեք չէինք պատկերացնի, որ մենք՝ որդիներ կորցրած մայրերս, երբևիցե կհավաքվենք այստեղ ու կլսենք, թե ինչպես են ազերիները հենց այստեղ ինչ-որ եվրոպական խնդիրներ քննարկում։ Թշնամին, որ սպանեց հազարավոր հայ տղաների, այսօր մեր հայկական հողում է, սա աննկարագրելի մի բան է»,- իր ելույթում ասաց զոհված զինծառայողներից մեկի մայրը։
«Այդ դահլիճում նստած պատվիրակը գուցե հենց այն զինվորն է, որ սպանել է իմ որդուն։ Միայն այդ մտքի գիտակցումն արդեն իսկ խելագարության հասցնող մի ցավալի բան է։ Իմ որդին չի զոհվել, որ նրանք գան Երևանի կենտրոնում սուրճ խմեն»,- հավելեց նա։
