Ադրբեջանցի պատգամավորները ժամանելու են Երևան

Այսօր և վաղը Երևանում տեղի կունենան Եվրանեսթ խորհրդարանական վեհաժողովի բյուրոյի և հանձնաժողովների նիստերը: Նիստերին կմասնակցեն Եվրամիության Արևելյան գործընկերության երկրների խորհրդարանների և Եվրոպական խորհրդարանի պատգամավորներ: Պլանավորվում է Եվրոպական խորհրդարանի, ինչպես նաև Ադրբեջանի, Ուկրաինայի, Վրաստանի խորհրդարանների պատգամավորների այցը Երևան: Եվրանեսթի Քաղաքական հարցերի, մարդու իրավունքների և ժողովրդավարության հարցերի, Էներգետիկ անվտանգության հարցերի, Տնտեսական ինտեգրման, իրավական մոտարկման և ԵՄ քաղաքականությունների հետ համապատասխանեցման հարցերի, Սոցիալական հարցերի, կրթության, մշակույթի և քաղաքացիական հասարակության հարցերի հանձնաժողովների նիստերը կանցկացվեն փետրվարի 22-ին Երևանի Կարեն Դեմիրճյանի անվան մարզահամերգային համալիրում:

Ադրբեջանը ևս պատրաստվում է պատվիրակներ ուղարկել Հայաստան: Ազեր Քարիմլին, Թայիր Միրկիշիլը և Սոլթան Մամադովն այսօր կժամանեն Երևան։ Ադրբեջանցի պատվիրակները հանգրվանելու են «Մարիոթ» հյուրանոցում, իսկ վաղը մասնակցելու են նիստերին։ Ընդդիմադիր ուժերն այսօր և վաղը բողոքի ակցիաներ են իրականացնելու թե՛ հյուրանոցի, թե՛ Մարզահամերգային համալիրի մոտ՝ իրենց բողոքը հայտնելու եվրոպական կառույցներին Ադրբեջանի և Թուրքիայի հայատյաց քաղաքականության շարունակական դրսևորումներին չարձագանքելու, հայ գերիներին վերադարձնելու ուղղությամբ ոչ բավարար ճնշումներ գործադրելու, Հայաստանի և ագրեսոր Ադրբեջանի միջև հավասարության նշան դնելու արատավոր քաղաքականության վերաբերյալ։

Բողոքի այդ ակցիաները անհրաժեշտ է, որ բազմամարդ լինեն, հակառակ պարագայում փաշինյանական իշխանությունը դրանց սակավամարդությունն օգտագործելու է հերթական քարոզչական փուչիկը փչելու, միջազգային հանրությանն էլ համոզելու, թե Հայաստանում քչերն են բողոքում խաղաղության դարաշրջան բացելու իրենց քաղաքականության դեմ։ Իհարկե, համընդհանուր ապատիայի այս պայմաններում բարդ է մեծաքանակ բազմություն հավաքելը։ Հենց այդ հանգամանքի վրա էլ հույս են դրել գործող իշխանությունները, որոնք րոպե անգամ չեն կորցնում իրենց ապազգային քաղաքական ռևերանսներն անելու հարցում։

Մամիկոն Համբարձումյան