Ամերիկացիների ապտակը «ժողովրդավար» Փաշինյանին
ՀասարակությունՄիացյալ Նահանգների դիրքորոշումն այն է, որ Հայաստանում մարդիկ պետք է ազատ լինեն քննադատել կառավարությանը՝ առանց հաշվեհարդարի վախի։ ԱՄՆ դեսպանատունն այսպիսի մեկնաբանություն է տվել ի պատասխան Հայաստանում խոսքի ազատությունը սահմանափակող և լրագրողներին թիրախավորելու վերջերս ձևավորված մշակույթի։
NEWS.am-ի խնդրանքով անդրադառնալով իրավապաշտպանների կողմից բացասական գնահատականի արժանացած՝ ծանր վիրավորանքը քրեականացնող օրենքի նոր դրույթին և իշխող ուժի պատգամավոր Վահագն Ալեքսանյանի՝ խորհրդարանի ամբիոնից լրագրողներին վիրավորելու դեպքին, դեսպանատունն արձանագրել է․ «Ազատ խոսքը հիմնարար իրավունք է և, չնայած միտումնավոր ապատեղեկատվության ու անվտանգության օրինաչափ մտահոգություններին, մարդիկ պետք է ազատ լինեն քննադատել կառավարությանը՝ առանց հաշվեհարդարի վախի։ Ազատ մամուլը լավ գործող ժողովրդավարության անբաժանելի մասնիկն է։ Մենք հանձնառու ենք աջակցել ժողովրդավարության սկզբունքներին, այդ թվում ազատ արտահայտվելու ապահովմանն ուղղված Հայաստանի քաղաքացիների ջանքերին»։
Հիշեցնենք, որ Freedom House իրավապաշտպան կազմակերպությունը Հայաստանի իշխանություններին կոչ է արել դադարեցնել ծանր վիրավորանքը քրեականացնող օրենքի դրույթը, որով արդեն 260 քրեական գործ է հարուցվել։ Հեղինակավոր միջազգային կազմակերպությունը արձանագրել է, որ այդ գործերը խոսում են Հայաստանում ժողովրդավարական նորմերի հստակ քայքայման մասին և բացասական ազդում խոսքի ազատ արտահայտման վրա: Ազգային ժողովի «Քաղաքացիական պայմանագիր» խմբակցության պատգամավոր Վահագն Ալեքսանյանը, անդրադառնալով վարչապետ Նիկոլ Փաշինյանի ընտանիքին վարկաբեկող հրապարակումներ անող լրագրողներին, նրանց անվանել էր «վերբալ մարմնավաճառներ»։ Օրեր առաջ էլ վարչապետի պաշտոնը զբաղեցնող Նիկոլ Փաշինյանը Ազգային ժողովի ամբիոնից լկտիաբար հայտարարել էր, թե «Հայաստանի միջազգային իմիջն ու բրենդը ժողովրդավարությունն է»։
Թերևս, ԱՄՆ դեսպանատան այս դիտարկումը վկայում է, որ Փաշինյանի նորաստեղծ բրենդը փոշիացել է՝ այդպես էլ միս ու արյուն չստանալով։ Նույնիսկ միջազգային կազմակերպություններն ու գերտերությունները լուրջ չեն ընդունում Նիկոլ Փաշինյանին, իսկ նրա հայտարարությունները հերքում են հաշված օրերի ընթացքում։ Միգուցե, «ձախողված բռնապետություն» կառուցելու ճանապարհին փաշինյանական վարչախումբն անուշադրության մատնի ԱՄՆ դեսպանատան այս հայտարարությունը, սակայն Հայաստանի քաղաքացիները պետք է հերթական անգամ գիտակցեն, որ Նիկոլ Փաշինյանն ու իր սպասարկուները պարզապես մոլորեցնում են հանրությանը, խաբում, թե իրենց արտերկրում լուրջ են ընդունում, մարդատեղ հաշվում։
Տարոն Մեհրաբյան
