Նոր մանրամասներ սահմանային իրավիճակից. ինչ զինատեսակից են արձակվել կրակոցները
ՀասարակությունԱռավոտյան Կարմիր Շուկայում և Թաղավարդում եղել է թիրախավորված կրակահերթ՝ բնակելի տների ուղղությամբ: Բարեբախտաբար, չունենք որևէ տուժած: Այս մասին ԼՈՒՐԵՐ.com-ի հետ զրույցում ասաց Արցախի Հանրապետության ԱԺ «Արդարություն» խմբակցության պատգամավոր Մետաքսե Հակոբյանը: Նրա խոսքով՝ կրակահերթը տևել է շատ կարճ.
«Բնակիչները ինձ հետ զրուցելիս ասացին, որ կրակահերթը արձակել է մեկ հոգի, որը, հնարավոր է, եղել է խմիչքի ազդեցության տակ և որոշել է «աքլորանալ»: Այդ ամենի հետևանքով, ըստ նախնական տվյալների, վնասվել է 1 տուն, այս պահին այնտեղ փորձագետներ են և փորձում են հասկանալ, թե էլ ինչ վնասներ կարող են հասցված լինել բնակելի տներին»,- ընդգծեց պատգամավորը:
Վերջինս նշեց, որ գյուղի տարածքում տեղակայված են ռուս խաղաղապահներ, որոնք շատ արագ արձագանքել են. «Հետո նրանք ավելի մանրամասն տեղեկություն կտան, թե ինչ զինատեսակից է արձակվել կրակահերթը, որքան է այն տևել և այլն»,- նշեց Մետաքսե Հակոբյանը:
Հետաքրքրվեցինք, թե բնակիչները հոգեպես ինչ վիճակում են գտնվում կատարվածից հետո, մեր զրուցակիցը պատասխանեց, որ նրանք շատ զուսպ են և հիմնականում փորձում են ցույց չտալ այն, ինչ կատարվում է իրենց ներսում. «Երբեք ցույց չեն տալիս իրենց վախը, խոսում են այնպես, ինչպես յուրաքանչյուր խաղաղ օր: Չեմ ասի, որ իրենք հարմարվել են այդ ամենի հետ, քանի որ մարդու բնազդը թույլ չի տա հարմարվելու, բայց իրականում Կարմիր Շուկայի, Թաղավարդի բնակիչները շատ պինդ ու ամուր յուրահատուկ մարդիկ են: Նրանք այդ պայմաններում շատ ավելի պինդ են կպած հողին, քան պատերազմից առաջ: Ես առաջինը հարցնում եմ՝ երեխաները վախեցե՞լ են, ի՞նչ ապրումներ ունեն: Մի պահ եկեք պատկերացնենք, որ ուղղակի այդ գյուղի բնակիչների և երեխաների համար պատերազմը չի ավարտվել, իրենք բակ դուրս գալիս, դպրոց կամ աշխատանքի գնալիս ամեն վայրկյան մտածում են, որ հաջորդ պահին կարող են դա չունենալ»,- ասաց Մետաքսե Հակոբյանը՝ հավելելով, որ միանշանակ եթե չլինեն մեր զինվորներն ու ռուս խաղաղապահները, ապա անհնար կլինի այդտեղ բնակվելը, քանի որ նրանք ադրբեջանական կողմի համար զսպող հանգամանք են:
Հիշեցնենք, որ Արցախի ՄԻՊ Գեղամ Ստեփանյանը գրառում էր կատարել, որում նշված էր, որ այսօր՝ փետրվարի 11-ին՝ ժամը 05:50-ի սահմաններում, Արցախի Հանրապետության Մարտունու շրջանի Կարմիր շուկա և Թաղավարդ համայնքների հարևանությամբ տեղակայված ադրբեջանական դիրքերից կրակահերթեր են արձակվել դիտարկվող բնակելի տների ուղղությամբ։
Զվարթ Պետրոսյան
