Հայաստանի շուրջ ընթացող զարգացումները լավատեսության որևէ հիմք չեն տալիս
Հասարակություն
Ադրբեջանական իշխանությունը մեզ հետ խաղաղության մասին միշտ խոսում է սպառնալիքով` երկիրը վերացնելու, ավերելու սպառնալիքով: Այս արձանագրումն արել է Հայաստանի Մարդու իրավունքների պաշտպան Արման Թաթոյանը, ով օրեր անց կհեռանա իր զբաղեցրած պաշտոնից՝ իր տեղը զիջելով փաշինյանական վարչախմբի հերթական նշանակյալին։ Թաթոյանն արդարացիորեն նշում է, որ սա ոչ միայն և ոչ այնքան հռետորաբանություն է, այլ հայատյացության տարիների պետական քաղաքանություն (կրթություն, մշակույթ, սպորտ և այլն)` մարդու իրավունքների խախտումների, պատերազմական հանցանքների իրական աղբյուրը:
ՄԻՊ գնահատմամբ, Հայաստանին պետք են մեր իրավունքների իրական երաշխիքներ. մնացյալ ամեն ինչ պատրանք է: Հեռացող օմբուդսմենը 44-օրյա պատերազմում հայկական կողմի կրած պարտությունից հետո եզակի պաշտոնյան է, ով իրապես բարձրաձայնում էր ադրբեջանական պետական քաղաքականության վտանգները, սահմանամերձ դարձած բնակավայրերում բնակիչների առօրյա խնդիրները, ռազմագերիների հարցը։ Ըստ երևույթին, առաջիկայում կզրկվենք այդ հարցերը պետական մակարդակով վերջին բարձրացնողից։ Իրավապաշտպան կառույցների ակնհայտ պասիվությունն ու գործող վարչախմբի նկատմամբ մեղմ վերաբերմունքը վկայում են, որ Հայաստանում քաղաքացիները հայտնվել են ծանրագույն մի իրավիճակում, որտեղից ելքեր գտնել է հարկավոր։
Նախկին իշխանությունների օրոք ամեն առիթով իրենց աղաղակները մինչև արևմտյան կառույցներ հասցնողները, կարծես, բնավ մտադիր չեն արձանագրել փաշինյանական վարչախմբի ապօրինությունները, հատուկենտ մարդիկ են, որ մնացել են իրավապաշտպանության բարձունքում։ Մինչդեռ, Հայաստանի շուրջ ընթացող զարգացումները լավատեսության որևէ հիմք չեն տալիս։ Թե՛ Ադրբեջանի, թե՛ նրա դաշնակից Թուրքիայի վարքը վկայում է՝ նոր վտանգներ են սպասվում, որտեղ առաջին տուժողը լինելու է Հայաստանի Հանրապետությունն ու նրա քաղաքացին։
Լևոն Մանասյան
