Քանի որ այս իշխանությունը որևէ ոլորտում դրական բան չի արել, ուստի խուսափում է որևէ ոլորտում առկա բացասական բաների մասին խոսել. Նաիրի Սարգսյան
ՔաղաքականությունՀայաստանի Կառավարության վարած տնտեսական անորոշ քաղաքականության հետևանքով հայ կանայք սկսել են երեխաներ ունենալ ԱՄՆ-ում, իսկ շատ ավելի համեստ ֆինանսական միջոցներ ունեցող ընտանիքներում ծնողներն իրենց երեխաներին դարձնում են Ռուսաստանի Դաշնության քաղաքացիներ, իսկ այս ամենի հիմնական պատճառն առկա անորոշություն է՝ ոչ միայն հաջորդ տարվա հետ կապված, այլ նաև ավելի երկարաժամկետ հեռանկարի համար։
168 TV-ի «Ռեվյու» հաղորդաշարի եթերում ամփոփելով այս տարի Կառավարության վարած տնտեսական քաղաքականությունը, տեսակետ հայտնեց Հայաստանի Աուդիտորների պալատի նախագահ Նաիրի Սարգսյանը, ապա հիմնավորեց հնչեցրած մեկնաբանությունը.
«Մենք ունենք ծնելիության 1.6 գործակից ու արտագաղթի ահագնացող աճ, իսկ սա նշանակում է, որ Հայաստանը 25 տարի անց կունենա 1 միլիոնից պակաս բնակչություն, որովհետև Կառավարությունը որևէ բան չի անում իներցիայով ընթացող տնտեսությանն իրական աճ հաղորդելու համար»։
Ընդգծենք, որ միայն այս տարվա 9 ամիսների ընթացքում Հայաստանից մեկնել է 548,8 հազար և վերադարձել 445,3 հազար ՀՀ քաղաքացի։ Մեկնողներն ավելի քան 103,5 հազարով գերազանցել են ժամանողներին։ Նման ցուցանիշ վերջին տարիներին երբևէ չէր գրանցվել։
Ներկայացված տվյալների արտագաղթի աճման միտումները նվազեցնելու գործոն Նաիրի Սարգսյանը դիտարկեց Հայաստանի տնտեսության աշխուժացումն ու ներդրումների ծավալների ավելացումը, որը կբերի Հայաստանում նոր աշխատատեղերի ստեղծման հնարավորության, ինչը, սակայն, չկա։
«Երբ իրենք եկան իշխանության, խոստանում էին, որ աշխատատեղեր են ստեղծելու, հետո սահուն կերպով անցում կատարեցին, թե՝ գրանցված աշխատատեղերի քանակն է ավելացել ու հենց այստեղ է այս իշխանությունը մանիպուլյացնում, որովհետև, թեև շատ լավ է, որ աշխատատեղերը ստվերից դուրս են գալիս, սակայն դա իրականում որևէ հավելյալ արժեք չի ստեղծում։ Իրականում պետական բյուջեի վրա խողովակից հոսքը կտրվում, մուտք է արվում մյուս խողովակով։ Ստվերից դուրս եկած աշխատատեղերը, այսպես թե այնպես, կային, ու դրանք ստեղծողներն այս իշխանությունները չեն, հետևապես՝ իշխանությունը թույլ է տալիս արտահայտելու մտքի գոհարներ, որոնց հետ ինքը կապ չունի։ Այստեղ, սակայն, հարց է առաջանում՝ իսկ քանի՞ դրամի հավելյալ արժեք եք ստեղծել դուք ու քանի՞ աշխատատեղ»,- ասաց Սարգսյանը՝ հիշեցելով, որ ուրիշների ստեղծած աշխատատեղերով գլուխ է գովում մի իշխանություն, որի գործունեության ընթացքում Հայաստանում աղքատության ծավալներն ահագնացող տեմպերի են հասել։
«Քանի որ այս իշխանությունը որևէ ոլորտում դրական բան չի արել, ուստի խուսափում է որևէ ոլորտում առկա բացասական բաների մասին խոսել. խուսափում է աղքատության մասին խոսելուց, որովհետև ահագնացող տեմպեր ունենք։ Աղքատության մակարդակի աճի մասին, իհարկե, որևէ դեպքում չեն խոսի, բայց կխոսեն, իբրև թե, աշխատավարձի ավելացման մասին, ինչը, սակայն, ռեալ իրականության հետ կապ չունի, և սա պարզապես ամոթալի է, որովհետև իրենք ոչ թե իրական աշխատավարձ են բարձրացրել, այլ թղթի վրա գրվածը, որ կարողանան ավել հարկ գանձել, բայց մարդկանց իրական աշխատավարձը չի ավելացել»,- ասաց Սարգսյանը։
Արտագաղթի աճող տեմպերին ու աղքատության 47,6 տոկոս ցուցանիշին զուգահեռ՝ Սարգսյանն ուշադրություն հրավիրեց պետական համակարգում կատարվող շքեղ ծախսերի, գնվող մեքենաների ու պարգևատրումների վրա, որոնք արվում են Հայաստանի արտաքին պարտքն ամեն օր ավելացնելու հաշվին։
«200 հազար դոլարով ԱԺ նախագահին մեքենա են գնում, մինչդեռ կարելի էր սահմանամերձ համայնքում փոքր թռչնաբուծարան բացել այդ գումարով, աշխատատեղեր ստեղծել, համայնքի բնակիչներին վաճառել բաժնետոմսեր. չէ՞ որ Հայաստանի թռչնամսի սպառման ուղիղ 50 տոկոսը ներկրվում է, մինչդեռ պետությունը նման ներդրում կատարելով՝ կարող էր հարցը որոշակիորեն լուծել»,- ասաց Սարգսյանը։
Դիտարկմանը՝ 200 հազար դոլարով ԱԺ նախագահի մեքենայի գնումը քննադատողներին «Քաղաքացիական պայմանագիր» կուսակցության պատգամավոր Խաչատուր Սուքիասյանը հարց ունի՝ «ԱԺ նախագահը կարո՞ղ է էշով ման գալ», Նաիրի Սարգսյանն արձագանքեց.
«Այո՛, ԱԺ նախագահը պետք է էշով ման գա, քանի դեռ Հայաստանի բնակչության 50 տոկոսն էշով էլ չի կարողանում ման գալ»։
Հարցազրույցի մանրամասները՝ տեսանյութում
