Պատվաստված լինելով՝ կորոնավիրուսից մահացել են. Անահիտ Ավանեսյան
ՀասարակությունԱռաջիկա շաբաթվա ընթացքում, ամփոփելով այս ընթացքում իրականացված պատվաստումները և մահերի համադրություն իրականացնելով, կհրապարակենք, որ ունեցել ենք դեպքեր, որ պատվաստված լինելու պարագայում էլ, ցավոք սրտի, քովիդից մահացել են: Այս մասին այսօր՝ նոյեմբերի 8-ին, ԱԺ-ում հայտարարեց ՀՀ առողջապահության նախարար Անահիտ Ավանեսյանը՝ նշելով, որ այդ տեղեկատվությունն առաջիկայում կհրապարակվի։
Նրա խոսքով, Առողջապահության նախարարությունը ռեստրոսպեկտիվ միջոցներ չունի՝ պարզելու համար, թե կովիդից մահացածը պատվաստման սերտիֆիկատը ձեռք է բերել առանց պատվաստվելու, թե իրոք պատվաստված է եղել, և այդ անկարողությունը հարցեր կառաջացնի պատվաստման արդյունավետության վստահության վրա:
«Իրավապահները պետք է շարունակեն կանխարգելիչ միջոցներ իրականացնել և խստորեն արձագանքել՝ նման դեպքերը բացահայտելով։ Վատ եմ ինձ զգում ասելու, բայց՝ նաև խստորեն արձագանքելով, որովհետև, նման արարքը վտանգում է տվյալ անձի կյանքին ու առողջությունը, ինչպես նաև՝ հանրային առողջությանը»,- հայտարարեց Ավանեսյանը:
Նախարարը խոստացավ, որ առաջիկա շաբաթվա ընթացքում ամփոփելով նախորդ ժամանակահատվածում պատվաստվածների շրջանում մահերի թվերը, կհամադրեն դրանք և կհրապարակեն վիճակագրությունը:
«Պատվաստումն արդյունավետ միջոց է, բայց մենք չենք կարող բացառել թե՛ վարակելիությունը, թե՛ հիվանդացության ծանր ընթացքը և թե՛ մահացությունը»,- ասաց առողջապահության նախարարը:
Նախարարը կարևորեց՝ պետք է գիտակցել, որ պատվաստումները արդյունավետ միջոց են, բայց մենք չենք կարող բացառել թե՛ վարակելիության դեպքը, թե՛ հիվանդության ընթացքի ծանրությունը թե՛, ցավոք սրտի, նաև մահը։
Ավանեսյանի խոսքով՝ այլ երկրներում էլ պատվաստված անձինք 98-99 տոկոսով հիվանդությունն անցնում են թեթև, միջին ծանրությամբ, եթե վարակվում են: «Շատ-շատերը չեն էլ զգում, որ վարակվել են, սիմպտոմներ չեն ունենում, որովհետև պատվաստված են: Բայց, իհարկե, լինում են նաև մահացության դեպքեր»,-ասաց նա՝ ընդգծելով, որ դա որևէ ձևով չպետք է ստվերի պատվաստման արդյունավետությունը։
«Այո, պատվաստումներն էլ, ինչպես ցանկացած դեղամիջոց, բժշկական միջամտություն, ունեն արդյունավետության աստիճան, և որևէ բան հարյուր տոկոսով երաշխիք չի կարող տալ»,-հավելեց նախարարը։
