Եղել են դեպքեր, երբ մերժել եմ նույնիսկ շատ հայտնի երգիչների․ Էմանուել Հակոբյան
ՀասարակությունԵրաժիշտ, երգիչ, գործիքավորող Էմանուել Հակոբյանը, ով հանրությանն առավել հայտնի է Eman մականվամբ, առաջիններից էր, ով երիտասարդ սերնդին ներկայացրեց հին, բայց և չմոռացված երգերը։
«Առաջին արտիստը, ում հետ համագործակցեցի, Ֆելիքս Խաչատրյանն էր՝ 3․33 խմբի շրջանականերում։ Դեռ 2012թ․ աշխատեցինք «Չինար ես» երգի վրա։ Այդ ժամանակ, ի տարբերություն այսօրվա, դա նոր երևույթ էր հայկական շոու բիզնեսում։ Ժողովրդական երգը ներկայացրինք ռեպ տարբերակով։ Իհարկե, մտածում էինք նաև ձախողվելու մասին, բայց պետք է փաստեմ, որ այդ աշխատանքը մեծ հաջողություն ունեցավ»,- մեզ հետ զրույցում պատմեց երաժիշտը՝ շարունակելով․
«Ցանկացած երգ վերափոխելուց առաջ ես նախևառաջ փորձում եմ հասկանալ, թե այն որքանով հաջողված և հիթային կարող է դառնալ։ Ինքս ինձ համար պատկերացնում եմ, որ այն ոչ թե հին, արդեն բոլորին հայտնի երգ է, այլ բոլորովին նոր աշխատանք։ Եթե այդպես չանեմ, ապա երևակայությունս չեմ կարող օգտագործել, ուղղակի կմնամ հին տարբերակի շրջանակում։ Անկեղծ կլինեմ և կասեմ, որ հին երգերը նորովի դարձնելը շատ ավելի դժվար է։ Ինքնըստինքյան մրցակցություն է առաջանում հնի և նորի միջև։ Այնպես պետք է անել, որ նոր տարբերակը բոլորովին չզիջի հնին, քանի որ այդ ժամանակ ուղղակի անիմաստ կլինի այն ներկայացնելը»,- ասաց Էմանուելը։
Վերջինս նշեց, որ իրեն առաջարկված ամեն գործ չէ, որ ընդունում է: Հիմնականում կարևորում է, թե տվյալ աշխատանքը հնարավորություն ունի՞ հիթային դառնալ, թե՝ ոչ․
«Եղել են դեպքեր, երբ մերժել եմ նույնիսկ շատ հայտնի երգիչների, քանի որ իմ կարծիքով՝ նրանց կողմից սխալ երգ է ընտրված եղել։ Այս պարագայում ստացվում է, որ կատարում ես աշխատանք, սակայն այն համապատասխան արդյունք չի ունենում։ Շոու բիզնեսի յուրաքանչյուր ներկայացուցիչ ունի իր նախասիրությունները, իսկ մենք՝ երաժիշտներս, ունենք ընտրելու հնարավորություն՝ աշխատել նրանց հետ, թե ոչ։ Իսկ իմ կանխազգացումն ինձ երբեք չի խաբում։
Օրինակ, «Հակոբ Հակոբյանի և Արմեն Հովհաննսիյանի հետ ազգագրական երգերի շարան արեցինք՝ ներկայացնելով դրանք նոր տարբերակով։ Փորձեցինք շատ չհեռանալ բնօրինակից, որպեսզի թե նոր սերնդին լսելի լինեն, թե շարունակեն հին սերնդի սրտին մոտ լինել։ Կա մի սահման, որից, նմանատիպ երգերի դեպքում, պարզապես իրավունք չունենք հեռանալու։ Ինչպես նաև ես և Ալիկ Հակոբյանը աշխատեցինք մի նախագծի շրջանակում, երբ արդեն իսկ շատ սիրված և շատ հայտնի երգերը («Կառուսել», «Քո աչքերը, «Իմ ախպերը», «Անցիր նավակ», «Վույ աման, աման, «Շարժիր թաշկինակը») ժամանակակից ձևով մատուցեցինք, ինչից հետո հենց, կարելի է ասել, հայկական երգարվեստում շատացան նմանատիպ աշխատանքները։
Իսկ Ռաֆայել Թունյանի հետ հանդիսատեսին ներկայացրինք «Կապույտ աչքերը», որը ես համարում եմ ամենաստացված աշխատանքներից մեկը, և «Բինգյոլ» երգերի նոր տարբերակները։
Ինչպես նաև դերասան Ռաֆայել Երանոսյանի հետ համագործակցել եմ հայտնի «Ճոճանակ», իսկ Միհրան Ծառուկյանի հետ՝ «Սիրուս կսպասեմ» երգերի շրջանակներում» և այլն։
Պետք է անպայման շեշտեմ, որ այս աշխատանքներից գրեթե բոլորը միլիոնավոր դիտումներ են գրանցել համացանցային տիրույթում, ինչը, ըստ իս, խոսում է դրանց հաջողության և իմ՝ որպես երաժիշտ, չսխալվելու մասին»,- եզրափակեց Էմանուել Հակոբյանը։
